Nagaland hi Hindutva-ah kan inhnimphum maithei : NPCC

Nagaland Pradesh Congress Committee (NPCC) chuan Bharata Janata Party (BJP) chu mipuite leh civil society duhdan pawh zah zo loa inthlanna kaltlang luihpui tumah a puh a, an thiltih chu theihnghilh a ni ngai tawh dawn lo a ni, an ti.

NPCC Media Cell-te'n thuchhuah an siamah chuan BJP chu vote a leia lei tum niin an sawi a, state-ah pawisa hmanga hnehna chan an tum thu an sawi. January 29-a Joint Declaration pawh engah mah an ngai lo niin an sawi.

BJP chuan vote hmangin hnehna chan tum mah se Congress erawh chuan vote lei an tum lo niin an sawi a, corruption chu a zung chawpa paih bo an tum thu an sawi. Pawisa hmanga vote lei chuan kar khat emaw thla khat emaw chauh hriatzui a hlawh a, chuvangin mipuite chu hetiang laka inthiarfihlim tur hian kan ngen a ni, an ti.

NPF leh BJP-te chuan inthlanna nei tura an inruahman tak tho siah chuan anni pawhin an election Manifesto an tihchhuah ve thuai dawn thu an sawi.

NPCC chuan hmabak ṭha tak neih nge pawisa thianghlim lo vanga kum nga chhung sorkar dem tih chu duhthlan tur awm chhun a nih dawn thu an sawi bawk.

An thuchhuah siamah chuan Naga mipuiten Chanchinṭha hril tura Nagaland pawnah mi an tirh laiin state chhungah zawk Hindutva-ah an inhnimphum mek thu an sawi a, NPF-BJP sorkar kaltlangin Hindutva tuipuitu te'n Nagaland-ah zirna in leh sumdawnna hmun an din mek a ni a, reiloteah Nagaland chu Hindutva-ah a la inhnimphum maithei a ni, an ti.

BJP leh an ideology hawtute'n BJP an thurualpui mek chu thil mak tak a nih thu an sawi bawk a, vote hmuhna atan chauha mipuite duhtu candidate chu mipuiten kan hnawl ngam a ngai an ni, an ti bawk.