GIS tluang takin zo fel

Global Investors Summit (GIS) 'Advantage Assam', Guwahati-a ni hnih chhung neih chu Pathianni khan tluang taka zawhfel niin, sumdawng lian Assam a investmnet tih tum an tam hle a, investment tih tum zawng zawng invest tum zat belhkhawm chu cheng vaibel­chhe nuai khat vel lai a tling.

He summit-ah hian khawvel huap pawha sumdawng langsar eng emaw zat an tel a, ni hnih chhung hian Memorandum od Understanding (MoU) 200 chuang ziah a ni bawk.

Ram hrang hrang 23 lai aṭangin summit chhim tur hian lo kal khawmin, palai 4000 chuang an awm a, heng zinga 200 vel hi chu ramdang mi an ni.

Summit kharna inkhawmah Assam Chief Minister Sarbanada Sonowal chuan thu sawiin, tunhma chuan Assam chu ram buai leh buaina tam tak awmna a nih ṭhin thu sawiin state hmel mawi lo tak a ni ve ṭhin a ni, a ti. Mahse Summit kaltlang hian Assam chu khawvel mithmuhah sumdawnna hmun leh investment tihna hmunpui a nih thu kan tarlang a ni, a ti bawk.

Union Electronics and IT Minister Ravi Shankar Prasad pawhin summit neih chu Prime Minister hmathliir tihhlawhtlinna pakhat a nih thu sawiin, hmarchhak chu ram ṭhanna hmanrua pakhata siamna tur a nih thu a sawi.

'Advantage Assam' chu Assam leh hmarchhak state-te tan chauh a nih loh thu a sawi a, ASEAN ramte leh BBN ramte nena inthlunzawmna ṭha zawk neihna tur a nih thu a sawi a ni.

Union Minister chuan Assam leh hmarchhak state-te chu ramchhung Electronic Hub-a siam tum a nih thu a sawi bawk a, hemi kawngah hian sorkar laipui pawhin hmalak a inpeih reng a ni, a ti. Assam hmun hrang hrangah BPO dah a nih dawn thu sawiin Kokrajhar, Nagaon, Silchar, Majuli leh Diphu-ah te pawh dah an ni dawn tih a sawi bawk.

Prasad hian hmalakna tur hrang hrang a tlangzarh nual bawk a, heng zingah hian NIC-a National Internet Exchange of India leh Centre of Excellence for Applications Security-te pawh a tel a ni.