Assam sorkar leh Ola in MoU ziak

Assam sorkar leh app hmanga taxi koh theih company lian leh lar Ola chuan Pathianni khan Memorandum of Understanding (MoU) an ziak a, Ola hian Guwahati-ah lawng taxi an service tirna turin inremna an ziak a ni.

MoU ziahnaah hian Assam state Transport and Industry Minister Chan­dra Mohan Patowary leh Ola Vice President (Operation) Nijay Ghadge-te an tel a, 'Global Investors Summit : Advantage Assam' neihnaah khan an ziak.

Ola hian 2014 khan Assam-ah hian taxi pangngai chu a lo tlantir daih tawh a ni.

Luia hman tur lawng taxi-te hi khawl hmanga tlantir tur a ni a, a chakin a tlawm zawk dawn a ni. Lachit Ghat, Machkhowa aṭanga North Guwahati route-a service tur niin kawngpuia minute 25 vel thang ngaihnaah minute 2-5 bak kal a ngai tawh dawn lo a ni. Hun hman a titlem chauh mai ni lo in chuan a nuam zawk dawn bawk.

Patowary chuan Assam-in inkawlpawhna kawng dangdai tak tak a neih thu sawiin chung zingah chuan lui hmanga inkalpawhna a tel thu a sawi a, hei hi Ola chuan ṭangkai taka an rawn hman dawn thu a sawi.

Ghadge pawhin lawng taxi service tir chuan transportation lamah khawpui a tichangtlung lehzual dawn niin a sawi bawk.