UDAN Project Centre Hub tur Guwahati

Airports Authority of India (AAI) Regional Executive Director Dharmendra Kumar Karma chuan Pathianni khan Guwahati-a Lokopriya Gopinath Bordoloi International Airport chu hmarchhak area leh ASEAN rama Ude Desh ka Aam Naagrik (UDAN) project kalpui a nih hunah project hmunpui tur a nih thu a sawi.

Global Investors Summit- Advantage Assam-a Civil Avia­tion session-a thu a sawinaah Karma chuan Jorhat leh Tezpur-ah te aiport tenau UDAN project hnuaiah siam a ni dawn tih a sawi bawk.

He hunah hianh Air Asia, India MD leh CEO Amor Abrol chuan Guwahati leh a chhehvela inter­national flight service a awm a pawimawh zia leh helam kawnga hmasawn a ṭul zia a sawi uar hle.

Abrol chuan Air Asia chuan India ṭhenawm ram te leh Guwahati inkalpawh theih a duh hle niin a sawi bawk. Captain G R Gopinath, Deccan Aviation Chairman leh CEO ni bawk chuan India rama khaw lian lo te teah te pawh airport siam a nih theihna turin ngenna a siam a ni.

Gopinath chuan Deccan Aviation in thla ruk chhunga domestic aiport 62 a hawn dawn thu a sawi. India ram mipui zinga 97% chuan thlawhna an la chuang ngai lo ni a sawiin UDAN hlawhtling taka kalpui a nih theihna tur chuan policy thlak a ṭul thu a sawi bawk.

Pawan Hans helicopter service CMD BP Sharma pawhin khua zawng zawnga airport siam a theih loh thu sawiin, Indian aviation chuan ṭangkai zawka helicopter a hman thiam a pawimawh thu a sawi.

Pawan Hans chuan a huang zauhin khaw 52-ah service siam belh a tum tih Sharma chuan a sawi a, heng zinga 20% chu Assam state-ah a nih dawn thu a sawi bawk. Sahrma chuan heli­copter mamawhna a nasa tawh hle niin a sawi bawk.