NDPP nen seat an insem danah Nagaland BJP lungawi lo

Nagaland inthlan neih tur atana Bharata Janata party (BJP) in-charge Kiren Rijiju leh Nationalist Democratic Progre­ssive Party (NDPP)-te'n inthlan huna seat an insem dan tur an tarlan chungchangah lungawi lo in BJP state unit chuan Pathianni khan an party hotu lu-te hnenah lehkha a thawn.

Nagaland BJP president Visasolie Lhoungu chuan BJP national president Amit Shah hnenah lehkha thawnin, state unit BJP chuan inthlan hmaa ṭanrualpui nei loa inthlanna kalpui an duh thu a ziak a, inthlan hnuah a ṭul a nih chuan ṭanrualpui neih an duh zawk thu a ziak.

Rijiju leh NDPP hotu Neiphu Rio-te'n Inrinnia Guwahati-a media mite hmaah BJP leh NDPP-ten inthlan hma ngeia ṭanrualna tur thutlukna an siam tih an sawi hnu lawkah state unit BJP lungawi lo hian Amit Shah hnenah hian lehkha hi an thawn ta a ni.

Nagaland inthlan turah hian seat 60 awmin Rijiju leh Rio-te'n thutlukna an siamah hian NDPP hi seat 40-ah an ding dawn a, a la bang seat 20-ah hian BJP hi an ding dawn thung a ni.

Party President hnena leh­kha an thawnah hian inthlana ding thei tur candidate 45 lai BJP chuan an neih thu an ziak bawk a, NDPP aia ṭhaa che thei turin inrintawkna pawh an nei lian tawk niin an ziak bawk. Lehkhathawnah hian party state General Secretary Eduzu Theluo pawhin a hming a ziak a ni.

BJP chu anmahnia an ding a nih ngat chuan party dang legislator BJP zawm duh an awm thu pawh an ziak a, Nagaland BJP chuan inthlan hmaa thurualpui an neih theih loh thu an ziak bawk.

Nagaland hian February 27 hian inthlanna an nei tawh dawn a, March 3-ah inthlan result hi puan tura ruahmanna siam a ni bawk a, March 5-ah chuan inthlan kaihhnawih thilte pawh buaipui fel vek tawh tura ruahmanna siam a ni.