Thu awmze nei lo sawitu PM awmchhun Modi : Rahul Gandhi

Congress President Rahul Gandhi chuan 2015 Naga Peace Accord chungchangah Prime Minister Narendra Modi chu na taka beiin Naga Peace Accord chu khawiah mah a taka hmuh tur a awm lo niin a sawi.

Rahul Gandhi chuan August 2015-ah Modi-an Naga accord ziak nia inchhal a, history a siam nia a insawi chungchang chu a twitter-ah ziakin, February 2018-ah pawh Naga accord chu hmuh tur a la awm chuang lo a ni, a ti. "Modiji chu India Prime Minister thu awmze awm lo sawi hmasa ber tu a ni", tiin a twitter-ah chuan a ziak.

PM Modi kaihhruai sorkar hian August 3, 2015 khan Naga hel pawh Nationalist Socialist Council of Nagaland - Isak Muivah (NSCN-IM)-te nen Framework Agreement, Naga politics buaina kum 70 zet chifel loha awm chinfelna tur an ziak a, hetah hian PM ngei pawh hi a awm ve a ni. Mahse he inremna ziahah hian eng nge inziak tih hi tun thlenga tlangzarh a la nih loh avangin eptu pawl leh mi tam tak chuan nasa takin an sawisel tawh a ni.

Modi chuan he Naga accord hi buaina tihrehna a la nih loh thu a sawi a,hmalam hun thar inṭanna a nih thu a sawi thung.

Rahul-a hian tunhnaia Naga civil society leh pilitical party ṭhenkhat ten inthlan ṭhulh rih tura PM an ngen chungchangah a lo ṭawngchhuak tawh bawk a, PM Modi chu Naga accord hman ṭanna tak tak tur daltu a nih thu a lo sawi tawh bawk.

Congress President chuan Naga accord chu demonetisation leh GST ang tho a nih thu a sawi a, tumahin Naga accord a siampui chhan an hre lo nia sawiin hei hi a tihdan ve reng a nih thu a sawi a ni.