RSS thuhnuaiah Assam CS leh DGP an awm : Tarun Gogoi

Assam Chief Minister Tarun Gogoi chuan Thawh;ehni khan Assam state Chief Secretary VK Pipersenia leh Director General of Police Mukesh Sahay chu RSS thuhnuaiah an awm thu sawiin RSS-te'n an thiltih zawng zawng an control vek a ni, a ti.

Pipersenia leh Mukesh Sahay-te hi Gogoi-a Chief Minister lai, 2015 khan CS leh DGP atan hian ruat an ni.

Gogoi chuan Chief Secretary leh DGP bakah officer tlemte in sorkar an kaihhruai thu a sawi a, hetih lai hian Pipersenia leh DGP chu RSS thuhnuaiah an awm a ni ,a ti.

CM hlui chuan hetiang hi ni lo se chu RSS ho an hmuh chhan tur a awm lo niin a sawi bawk.

Hetih lai hian Gogoi hian RSS hruai­tu hming mal sawilan a nei lo thung.

Congress hruaitu hlun Tarun Gogoi chuan heng officer pahnihte hi tuna dinhmun luah tura ruat an nih dawn khan Intellingence lamin RSS nen an inlaichin dan engmah an hrilh lo niin a sawi.

Gogoi chuan Himanta (Biswa Sarma) pawhin Rahul Gandhi hnenah a awm ve reng laiin RSS pa Chief Secretary atana ruat a nih thu a sawi nia sawiin khatih lai khan thu awmzia kha a hre lo niin a sawi. Himanta-a'n a bum ang chiahin Pipersenia pawhin a bum niin a sawi bawk.

Biswa Sarma hian Congress chhuahsanin 2016 Assembly inthlan dawn khan BJP a zawm a ni.

National Register of Citizenz chungchang pawh sawiin Gogoi chuan ṭawng tlem zawk hmang te leh sakhaw tlem zawk tam tak chu hmaih an nih thu a sawi bawk a ni.