Assam Rifles DG leh Manipur Chief Minister-te'n meeting nei

Assam Rifles Director General Lietenant Gene­ral Shokin Chauhan chuan ni hnih cham turin Thawhlehni khan Manipur a thleng a, Manipur hmun hrang hrang Jhoupi, Liemakhong leh Imphal-a Assam Rifles te hnathawh dan enfel turin Manipur hi a tlawh a ni.

Assam Rifles DG hi ram pumpuia Assam Rifles-te hmalak danah leh khawsak dana mawh­phurtu ber a ni.

Lieutenant General Shokin Chauhan hi Gene­ral Virendra Singh-a'n ṭawiawmin Thawhlehni khan Chief Minister N Biren Singh chu meeting an neihpui nghal. DG chuan Manipur mipuite duhsakna a hlan thu sawiin chibai a buk bawk tih a sawi.

CM leh DG in meeting an neihnaah hian PWD Minister Th. Biswajit Singh, Forest Minister Th. Shyamkumar, PDS Minister Karam Shyam, Chief Secretary R R Rashmi, Additional Chief Secretary (Home) Dr Suresh Babu leh Ashok Kumar, IAS, Secy to CM-te pawh an tel a ni.

Darkar khat chuang zet meeting hi neiin state chhunga dan leh thu­pek kalpui a nih dan chung­chang te an sawi ho a, DG chuan Chief Mi­nister hnenah venhim­na chak zawka kalpuina turin Assam Rifles lam chuan an theihna zawng zawnga thawhpui an inhuam thu a sawi. Shokin Chauhan chuan Ukhrul-a 1989-91 chhunga commander nau­pang tak nia a awmlai a hriat chhuah thu a sawi bawk.

Chief Minister leh Director General chuan Thawhṭannia Polo ground-a grenade bomb tihpuah a nih chu an dem thu an sawi.

Director General chuan hel pawlte laka beih­pui thlakna kawngah state sorkar chu nasa lehzual zawka thurualpui turin a ngen nghal a, Chief Minister pawhin dan loa thingzai hralhruk tur an man dan chungchanga Assam Rifles-te hmalakna chu a fak hle bawk a ni.