Fake encounter case : Manipur police pali court-ah inpe

Manipur-a kum 2010-a dawt  hmanga inbeihna thleng nia sawi chungchanga chhuina kal zelah, kar liam ta khan Manipur police pali chu Imphal West chief judicial magistrate court-ah an inpe. 

Kum 2000-2012 chhung khan Manipur-a hian Indian Army, Assam Rifles leh Manipur Police-te chuan dawt hmanga inbeihna, fake encounter-ah civil mi 1,528 zet an that nia puh an ni. 

Kum 2010, September 1 khan Manipur police-te chuan dawt hmanga inbeihna thlengah Irengbam Ratan­kumar chu Imphal West district-a Ningombam-Mongsangei Road-ah an kaphlum a, he thil thleng chungchangah hian complaint thehluh a nih hnuin Special Investigation Team (SIT) chuan a chhui zui a ni. SIT hian nikum May thla khan police pangate lakah chargesheet a siam a, court-ah pawh koh an ni tawh. 

Thubuai siamsak panga zinga palite chu court-ah inpein, an zingah hian Imphal West commando inspector pawh a tel. Thubuai siamsak zinga mi, rifleman Th Ibomcha erawh a la inpe ve lo.