Nagaland-ah NPF in ṭangrual sorkar zawm dawn : Eptu party an awm tawh dawn lo

Nagaland-a eptu party, Naga People's Front (NPF) chuan chief minister Neiphiu Rio kaihhruai People's Democratic Alliance (PDA) sorkar zawm an remtih ve leh tak avangin Nagaland-ah eptu party an awm tawh dawn lo.

Member 60 awmna, Nagaland Assembly-ah hian TR Zeliang kaihhruai NPF hi party mala MLA ngah ber niin MLA 25 an nei a ni. Ṭangrual sorkar, PDA-ah hian Nationalist Democratic Progressive Party (NDPP), BJP leh indepedent-te an tel a, Chief Minister sawmna angin NPF hian an ṭangrual sorkar hi an zawm ve leh dawn ta a ni. Hun reiloteah NPF MLA-te hi sorkar tharah hian lawmluh an ni ang.

NPF MLA-te chuan CM sawmna chungchang ngaihtuahin Thawhlehni khan meeting an nei a, Nagaland political issue chinfel a nih theihna atan intiam kamna engmah awm loin sorkar thawhpui hi an remti a ni.

Chief Minister Rio chuan NPF thutlukna siam chu lawmawm a tih thu sawiin, hei hian an state-a inremna tluantling siam anih theihna tura an inlungrual zia a lantir a ni, a ti. Naga issue chinfelna tura hmalaknan pawl hrang hrangte pawh inlungrual leh thawk ho tura an nawr tur thu a sawi, an thawhho vek a ṭul thu a sawi.

NPF-ten an tel dawn avangin PDA-a an thawhpui, BJP nen harsatna an neih phah dawn lo tih sawiin, inthlan dawna thawhdunna tur thuthlung leh seat insem dan tura an lo siam tawhte chu an vawng zel dawn tih a sawi a ni.