Assam-in Muslim chenna bial tan 'Population Army' din dawn

Assam sorkar chuan state chhunga Muslim tamna bialah mihring pung chak tur venna kawnga zirtirna nei turin 'Population Army' a din dawn tih chief minister Himanta Biswa Sarma chuan a sawi.

'Population Army' atan hian ṭhalai 1,000 vel chhawr an ni dawn a, anni hian mipuite hnena population control chungchangah zirtirna te pein, indanna damdawite an semṭhin dawn a ni.

Hemi chungchang hi Assembly inkhawma Congress MLA Sherman Ali Ahmed zawhna a chhannaah CM chuan sawiin, an state chhung a bikin khawthlang leh state laili lamah mihring an pung chak lutuk chu ngaihtuah a ngai hle tih a sawi.

CM chuan, " Char-Chapori area aṭangin ṭhalai 1,000 vel chhawrin, anni hian zirtirna an pe ṭhin dawn a ni," tiin heng mite bakah hian ASHA worker 10,000 vel chuan a hrana hna thawkin, birth control chungchangah mipuite an zirtir bawk dawn a ni, a ti.

Sarma chuan kum 2001-2011 inkara Assam-a Muslim te punna chu 29% a nih laiin, Hindu punna chu 10% a ni tih a sawi. "Kum 1991 khan Muslim pun chak lam chu 34% niin Hindu chu 19% a ni. 1991-2001 inkarah Muslim punna chu 29%-ah tlahniamin Hindu punna pawh 16% in a tlahniam a, mahse kum 2001-2011 inkarah Mulsim punna hi tlahniam loin 29% bawk a la ni a, Hindu erawh chu 16% aṭangin 10% ah a tlahniam thung a ni," tiin a sawi.

Mihring pung chak lutuk venna kawnga an hmalaknaah eptu party, Congress leh AIUDF chu thawhpui turin a sawm bawk. "Mihring pung chak lutuk hi Assam-a Muslim-te retheihna leh economy lama inthlauhna lutuk thlen chhan a ni. Muslim-te kan hua a ni lo a, retheihna umbo tumin hma kan la a ni zawk," a ti. Hmeichhiate tana pasal neih theih kum bithliah pawh tihsan dan ngaihtuah an tum tih a sawi bawk.

Assam sorkar hian state sorkar hnuaia scheme hrang hranga hamṭhatna dawng thei turin two-child policy kalpui a tum thu a lo sawi tawh bawk a ni.