Nagaland-ah mi 253 in nomination file ; Meghalaya-ah 443 in file

February 27-a inthlanna nei tur state pahnih Nagaland leh Meghalaya-ah chuan Nilaini thleng khan nomination file theih niin party hrang hrang aiawh ten nomination hi an file fel tawh a ni.

Nagaland
Nagaland bikah hian Nilaini thleng khan mi 253 in nomination an file tih Chief Electoral Officer Abijit Sinha chuan a sawi.

Heng nomination file zingah hian hmeichhe panga - National People’s Party (NPP) aṭangin A. K. Mangyangpula leh Wedie-u Kronu, Awan Konyak (NDPP), Rakhila (BJP) bakah Independent candidate Rekha Rose-te an tel a ni.

Chief Minister TR Zeliang pawhin Naga People's Front (NPF) aiawhin nomi­na­tion hi a file ve leh bawk a, Peren assembly constituency-ah a ding dawn a ni. Nomination a file dawn lo nia thu a than zet hnuah Chief Minister hlui Neiphiu Rio, Lok Sabha Member ni bawk pawhin NDPP tan nomination file in Northern Angami-II assembly constituency-ah a ding dawn bawk.

Independent-a ding tur ho bakah party pakua - NPF, NDPP, NPP, BJP, Congress, Janata Dal-United, Lok Janshakti Party, Nationalist Congress Party leh Aam Aadmi Party aiawhten nomination hi an file a ni.

Sinha chuan nomination paper enfelna hi nimin khan neih a ni tih a sawi a, February 12 thleng inhnuhdawh lehna hun an neih thu a sawi bawk.

Meghalaya
Meghalaya-ah ve thung chuan Nilaini thleng khan mi 443 in nomination an file tawh tih election official-te chuan an tarlang.

Chief Electoral Officer Frederick Roy Kharkongor chuan assembly constituency 60 awmnaah mi 443-in seat an inchuh dawn thu sawiin Nilaini bikah khan mi 126 in nomination an file thu a sawi.

Nagaland ang tho in nimin khan nomi­nation paper enfel a ni a, February 12 thleng candidate-te hi an inhnuhdawk leh thei a ni tih Kharkongor chuan a sawi bawk.

Chief Minister Mukul Sangma chuan nomination hmun hnihah a file a, Ampati leh Songsak constituency-ah te a ding dawn a ni. Ampati constituency-ah hian Mukul Sangma hian a zawnin term nga hnehna a lo chang tawh a, 1993 aṭang khan hnehna ala chang char char a ni.

Chief Minister hlui Salseng C. Marak leh Donkupar Roy-te chuan Congress leh United Democratic Alliance tan nomination an file thung.

Congress paihthlak tuma nasa taka hma la mek BJP chuan constituency 47-ah nomination file in National People’s Party, Nationalist Congress Party, Hill State People’s Democratic Party leh United Democratic Party aiawh te pawhin nomi­nation hi an file bawk.