Asia University ṭha zual 100-ah Tezpur University

Assam-a Tespur University (TU) chu Times Higher Education (THE)-in Asia rama University ṭha, Asia University Rankings 2018 a tihchhuah zingah 100-naah a awm.

Tezpur University hian kumin hi an Siver Jubilee hman kum tur a ni a, hetianga chanchin lawmawm an hriat hian an lawmna a tizual hle a, TU mai bakah Assam tan pawh thil chhinchhiahtlak tak a ni bawk.

Times Higher Education (THE) Asia University Rankings 2018-ah hian 100-na niin mellung pawimawh tak an phum a, kum kalta lamah kha chuan 131-140-na velah an awm ṭhin a ni. THE Asia University Ranking 2018 hi Thawhlehni zan khan tlangzarh a ni.

Asia university ṭha thlan nan hian Times Higher Education hian THE World University Rangking a siamna ang thoin tehna 13 a hmang a - teaching, research, knowledge transfer leh international outlook-te chu an tehna hmanraw zinga mite an ni bawk.

TU hi India ram University zingah pawh a ṭha ber pawlah thlan a lo ni fo tawh a, Higher Educational Institutions(HEIs) zingah pawh pasarihna a ni pha a ni.

Indian Institute of Science, Bangalore chu rangking-ah hian 29-na a ni pha a, Tezpur Univer­sity baka ranking a lang pha te chu Indian Institute of Science, Banga­lore, IIT Bombay, IIT Kharagpur, IIT Roorkee, IIT Kanpur leh IIT Delhi-te an ni thung.

Research category bikah chuan TU hi India ramah palina a ni a, IISc, Bangalore, IIT Bombay leh IIT Kharagpur-te a tluk lo a ni.

THE rank table-ah hian Uni­versity 350 a awm a, kum hmasa lam khan 300 a awm thung. Ram hrang hrang 25 aṭangin ranking hi siam a ni a, The National Uni­versity of Singapore chuan kum thum a zawnin pakhatna dinhmun a hauh tawh a ni.