Hmarchhak tana mumal taka hma la hmasa ber BJP : Modi

Prime Minister Naren­dra Modi chuan Ningani khan India-in zalenna a neih hnua hmarchhak hma­sawnna tur atana mumal taka hma la hmasa ber chu Bharatiya Janata Party (BJP) a nih thu a sawi.

Prime Minister chuan tunhnai kum thum leh a chanve chhungin minister-te leh top official-te'n vawi tam tak hmarchhak an tlawh niin a sawi a, Congress hunlai aiin a let tam takin top official-te'n hmarchhak an tlawh niin a sawi bawk. Hmarchhak state pariat-ah DoNER (Development of North Eastern Region) secretariat pawh ṭha taka kalpui a nih thu a sawi bawk a ni.

PM Narendra Modi hian Ningani khan Tripura-a BJP tan campaign-in, Sonamura leh Kailashahar-ah thu a sawi a ni. Kum 2022-ah chuan India in zalenna a neihna kum 75-na a lawm dawn a, hemi kum hi Tripura-in state puitlinga hlankai a nih golden jubilee-na kum chiah a nih ve tawh dawn thu a sawi bawk a ni. PM chuan hemi a nih avang hian Tripura mipuite chu uluk taka vote thlak turin a chah.

Narendra Modi chuan Tripura lal boral ta Bir Bikram Kishore Manikya-a duhthusam ang, Tripura changkang tak neih chu Left party-te chuan an tichhe vek niin a sawi a, a bulṭhut aṭanga thil kalphung thlak a ṭul thu a sawi.

Modi chuan BJP-in thuneihna an chan phawt chuan 7th Pay Commission pawh a rang thei ang bera hman a nih tur thu a sawi bawk.

Tripura education quality leh hna siam tam chungchang pawh sawiin CPI-M-te chuan sorkar laipuiah hemi chungchangah hian chhanna an nghak tih a sawi a, hetih lai hian kum 25 chhung teh meuh mipuite laka an rorel danah mipuite hnenah insawifiah turin a ngen let a ni.

PM Modi chuan ṭhalaite tan BJP in 'Trade, Tourism leh Training'-ah hma a la dawn tih a sawi bawk.

Left sorkar chu nasa taka sawiselin mipuite chanai eiah a puh a, sorkar laipui lamin hmarchhak hmasawnna atana a theihtawp a chhuah laia Tripura a hnungtawlh bik chhan chu kum 25 chhung an laka dik lo taka Left party-ten ro an rel vang niin a sawi.

Mipuite chu BJP vote tura sawmin Feb­ruary 18-a inthlanna neih turah Left Front sorkar chu kum 25 chhung dik lo taka ro an rel avanga hrem an nih theih nan Lotus Symbol vote turin a sawm a ni.

Modi chuan Tripura Chief Minister Manik Sarkar chu beiin a kurta var hnuaiah a rilru ṭha lo lam a awm niin a sawi a, Sarkar-a sorkar chuan Tripura mipuite leh mirethei te nasa takin an bum niin a sawi bawk.