Party nomination file tur dal tumah Rio puh

Nagaland-a sorkar lai Naga People's Front (NPF) chuan Chief Minis­ter hlui Neiphiu Rio chu Nilaini-a an party candi­date nomination file tumte lo dal tumah an puh.

Official complaint hi NPF hian an thehlut a, a copy pawh media lamah hmuhtur a awm nghe nghe a ni.

Chief Electoral Officer Abhijit Sinha pawhin NPF hian complaint hi an thehlut ngei tih a sawi a, Sinha chuan venhim­na ṭha tak hnuaiah NPF candidate tur ten nomina­tion hlawhtling taka an file thu a sawi bawk.

NPF general secretary S Akho Leyri chuan EC-ah complaint thehlutin an party candidate tur Chupfu-o nomination a file tur chu Neiphiu Rio hian a lo dang niin a sawi a, Nilaini tlai dar 2:20 bawr velah Nerhema thingtlang khuaa Northern Angami con­stituency-a contest turin nomination file a tum chu a lo dang niin a sawi.

Chief Minister pawh vawi thum lai lo ni tawh leh Lok Sabha member ni bawk MP Neiphiu Rio hi chief miniterial candidate a ni a, party thar Nagaland Democratic Progressive Party (NDPP) aiawhin a ding dawn a ni.

Rio hian Thawhlehni khan nomination paper a file tawh a, NPF chuan EC chu a rang lama action la turin an ngen.