Covid-19 : Hmarchhak dinhmun

Arunachal Pradesh-a Changlang district-ah Nilaini khan hri kai mi pakua hmuh chhuah an ni a, an state-a hri kai hmuh hi mi 38 an tling tawh a ni. 

Hri kai hmuh hmasa ber, Lohit district-a mi chu enkawl dam an ni tawh a, enkawl lai mi 37 an awm a ni. Covid-19 kai enkawl mek zinga 25 chu Changlang mi an ni a, Capital complex-a mi pasarih bakah, Namai, Lohit, Pakke Kessang, Upper Siang leh Tawang-a mi pakhat ṭheuh a ni. An vai hian asymptomatic vek an ni. 

Assam-ah Nilaini khan Covid-19 kai hmuh chhuah thar mi 269 an awm a, ni khata hri hmuh chhuah tam ber ni a ni. Assam-a hri kai hmuh tawh hi mi 1,830 an tling tawh.

 Dhubri district-ah hri kai hmuh thar hi tam berin mi 125 an ni a,  Dima Hasao (30), Hojai (20), Golaghat leh Nagaon (18 ve ve), Bishwanath (14), Darrang (13), Dibrugarh (10), Karimganj (seven), Kamrup, Lakhimpur leh Sonit­pur (pathum ṭheuh), Udalguri (pahnih) leh Cachar-ah pakhat a ni. 

Hri kai hmuh tawh mi 1,830 zingah 1,410 chu enkawl mek an ni a, enkawl dam mi 413 awmin, mi paliin he hri hi hi an thihpui tawh bawk. 

Assam-a hri kai hmuhte zinga tam tak hi state dang aṭanga haw an ni a, thlawhtheihna hmanga haw zinga pawh mi 66 chuan Covid-19 an kai tih hriat a ni tawh a ni. 

Health and family welfare depart­ment chuan sample  1,26,726 test a ni tawh tih a sawi. 

Nilaini khan Manipur-ah hri kai mi paruk hmuh chhuah thar an ni bawk a, an zinga pahnih chu Delhi aṭanga haw niin, Chennai aṭanga haw mi pahnih an tel bawk.

Manipur-ah hian Covid-19 kai mi 108 hmuh an ni tawh a, an zinga 70 chu enkawl mek an ni. 

Additional health director Dr K Sasheekumar Mangang chuan an state-a hri kai enkawl dam, recovery rate chu 39.18% a nih thu a sawi. Nilainia hri kai hmuh tharte hi RIMS-a Covid-19 care centre-ah dah luh nghal an ni tih a sawi bawk. 

Meghalaya-ah hri kai hmuh thar mi pahnih awmin, an state-a Covid-19 kai hmuh tawh hi mi 33 an tling tawh. 

Nilaini zan khan chief minister Conrad K Sangma chuan hri kai pahnih hmuh belh an nih thu hi sawiin, Goa leh Maharashtra aṭanga haw an nih thu a sawi. An pahnih hian Shillong-a quarantine lai an ni a, an dinhmun a ngaihtuahawm lo tih a sawi bawk. 

CM chuan hri kai hmuh tawh zinga mi 13 chu enkawl dam an ni tawh tih a sawi. Meghalaya-ah hian Covid-19 kai zinga pakhatin a thihpui tawh a ni. 

Nagaland-ah pawh Chennai aṭanga haw mi 22 chuan Covid-19 an kai tih hmuh chhuah a ni bawk a, hri kai hmuh tawh hi mi 80 an tling tawh. 

Health minister P Pangyu Phom chuan Nilaini khan Kohima leh Dibru­garh-a mi sample 171 test a ni a, heng zinga 20 chu a positive tih a sawi. 

Nagaland state chhunga hri kai hmuh hmasak ber chu May 25 kha niin Shramik special train hmanga Chennai aṭanga haw mi pathumin coronavirus hi an kai tih hmuh a ni. Hemi hnu hian tangkhang haw zingah hri kai hi hmuh belh chhoh reng an ni a, Nilainia mi 22 positive hmuh chhuah hi ni khata hri kai hmuh thar tam ber a ni. 

Nilaini khan Tripura-ah hri kai 151 hmuh chhuah thar niin, hri kai hmuh thar tam ber ni a ni. Tripura-a Covid-19 kai hmuh tawh hi mi 622 an tling tawh. 

Chief minister Biplab Kumar Deb chuan hri kai hmuh thar zinga a tam zawk hi hmun dang aṭanga haw an ni tih sawiin, mi ṭhenkhat chu hri kai nena intawhfuhna nei an ni bawk tih a sawi. 

Tripura-a hri kai zinga 445 chu Covid-19 hospital leh Covid care centre-ah enkawl mek an ni a, mi 173 chu enkawl dam tawh niin damdawiin aṭangin chhuahtir an ni tawh bawk.