AP CM-in SHG-te hnenah loan a sem

Arunachal Pradesh chief minister Pema Khandu chuan Nilaini khan virtual hmangin state chhunga Self-Help Group (SHG) 789-te hnenah loan, cheng vaibelchhe 8.27 a sem.

Loan hi Deendayal Antyodaya Yojana National Rural Livelihood Mission (DAY NRLM) hnuaiah sem niin, bank pathum - : State Bank of India (SBI), Arunachal Pradesh Rural Bank (APRB) leh Arunachal Pradesh State Cooperative Apex Bank (APSCAB)-ten an pe a ni.

APRG hian SHG 504 tan loan hi Rs vbc 4.9 pein, SBI-in SHG 174 tan Rs vbc 2.26 leh APSCAB-in SHG 111 tan Rs vbc 1.11 an pe.

DAY NRLM hi state Rural Development deparment-a Arunachal State Rural Livelihood Mission (ArSRLM)-in a kalpui a ni a, state chhunga SHG-te chhawmdawlna turin subsidised loan, Rs nuai khat ṭheuh an pe a ni. He scheme hi state chhunga district 22-ah kalpui mek a ni.

PM Khandu chuan state sorkarin rural economy siamṭhat chu a hmathlir neih pawimawh tak a ni tih sawiin, rural area tana hmasawnna tur leh, loan pek zat pawh tihpun a nih theihna turin a kaihhnawih minister, coordinator leh bank-te pawh session a neihpui dawn tih a sawi. "State chhungah SHG 3,796 an awm mek a, a tam zawk hi hmeichhiate din a ni. Heng pawl tinte hi theihtawpa ṭanpui leh chhawmdawl kan tum a, SHG Bank Linkage Program hnuaiah an vaia tel tir pawh kan tum a ni," a ti.

State sorkar hian ArSRLM kaltlangin DAY NROLM hi SHG 2,901 hnenah Rs nuai 435.15 leh community investment fund-ah SHG-a Primary Level Federation 280 tan Rs nuai 1,285.16 a pe tawh a ni. He hmalaknaah hian state chhunga bank , a bikin State Bank of India, Arunachal Pradesh Rural Bank leh Arunachal Pradesh State Apex Cooperative Bank-te chuan sorkar an thawhpui ṭha hle.