Meghalaya-in June 8 aṭangin border trade hawng dawn

Meghalaya sorkar chuan ramri kaltlanga sum­dawnna kalpui chu June 8 aṭangin hawn ṭan a tum. 

Nilainia review mee­ting neihah border trade hawn hi an rel a ni. Deputy chief minister Prestone Tynsong chuan Ministry of Home Affairs-in hriat­tirna a tihchhuah zulzuiin, border trade hi hawn tum a nih thu a sawi. Mahse international border-a ramri bazar-te erawh khar chhunzawm a la ni dawn tih a sawi bawk. 

Deputy CM chuan kar leh Thawhṭanni aṭangin state chhunga mall leh complex-te pawh hawn phalsak an ni tawh dawn tih a sawi. Heng hmun dawrte inhawn chhawkin, ni khatah 50% zel hawn an ni ang,a ti. Barber shop, salon leh beauty parlour-te chu khar an la ni dawn thung. 

State sorkar chuan contractor leh hnathawktu chhawr ṭhin dangte pawh mi an chhawr dawnin an state mite duhsak hmasa turin a chah bawk. NGO leh group hrang hrang chuan sorkar hnenah hripui leng avanga state chhung mi tam takin hna an chan avangin, inhlawhfa leh hnathawktu tur state pawn aṭanga an luh phalsak lo turin an lo ngen tawh a ni.