Manipur journalist nupuiin a pasal chhuah turin ngen

Facebook-a Covid-19 damdawi atana bawng ek leh zun a ṭha lo tih chungchang comment avanga May thlaa man leh National Security Act (NSA) hnuaia thubuai siamsak, Manipur journalist Kishorechandra Wangkhem chu chhuah zalen turin a nupuiin a ngen.

Wangkhem ruala police-ten an man, political activist Erendro Leichombam chu Supreme Court thupekin Thawhṭanni khan chhuah a ni. Hemi hnu hian Wangkhem nupui, Ranjita chuan chief secretary Rajesh Kumar hnenah lehkha thawnin, a pasal hi jail aṭanga chhuah tir ve turin a ngen a ni.

Chief secretary hnena lehkha a thawnah, Ranjita chuan, "Ka pasal hi May 17 aṭang khan Central jail Sajiwa-ah tan tir a ni a, a ruala an man leh thubuai in ang an siamsak Erendro Leichombam chu July 19 khan a thubuai titawpin chhuah zalen a ni tawh a ni," a ti. Ngenna a thlen chungchag hi Manipur sorkar chuan a la chhang lo.

Manipur-a TV journalist hriat hlawh tak, Wangkhem hi kum 2018 November thla kha chief minister N Biren Singh kaihhruai BJP sorkar sawiselna video clip chu social media-a a tichhuah avangin man a lo ni tawh a, sorkar laka hel tura mipuite fuiha puhna thubuai bakah, NSA Act hnuaiah thubuai siamsak a lo ni tawh bawk. Kum 2019, April thla khan Manipur High Court-in a thubuaite hi a tihtawp sak avangin chhuah a ni. Hemi hnu kum 2020, September thla khan social media lamah pawl pahnih inkara inhuatna thlen thei zawnga thu chhuaha puhin man a ni leh a, mahse December thlaah chhuah a ni leh a ni. A chhuah hnu hian Frontier Manipur zawmin, talk show a buatsaih ṭhin.