Gauhati HC-in AP sorkar thupek a dan sak

Gauhati High Court chuan Arunachal Pradesh sorkarin Covid-19 vaccine la tawhte chauh hnenah temporary work permit pekna tur thupek a lo tihchhuah tawh chu hmang rih lo turin a dan (stay) sak.

June 30-a sorkar thupek tihchhuah chungchangah hian Madan Mili chuan High Court-ah hian public interest litigation (PIL) a thehlut a, he thupek hi inthliarhranna niin a sawi. Court chuan PIL hi ngaihtuahin, sorkar thupek siam hi Constitution 14, 19 (1) (d) leh 21-a right to equality, freedom to move freely leh right to life and livelihood bawhchhiatna a ni tiin a dan sak ta a ni.

Court chuan, Covid-19 vaccine la tawhte chuan hri an kai thei tawh lo tih leh, hri pu darhtu an ni thei lo tih finfiahna leh record a awm lo tih sawiin, vaccine la tawh leh la lote pawh virus tidarhtu an la ni thei reng a ni, a ti. Hei vang hian vaccine la lote khuahkhirhna siam bik chu thil dik lo leh awmze nei lo a ni, tiin a sawi.