AP-in ILP pek chhuah khap zel

Arunachal Pradesh chief minister Pema Khandu chuan hripui leng vanga state dang nena inkal­pawhnaa khuah­khirhna siam leh, Inner Line Permit (ILP) pek chhuah khapna pawh hman chhunzawm a la ni tih a sawi. 

CM chuan an state-ah lockdown hman mek a la nih avangin hmun dang aṭanga lutte chu sorkarin quarantine centre a siamah an inkhunghran ngei a ngai a ni, a ti. 

Arunachal mi, state danga tangkhangte an haw mek a, an haw kim hun leh, boruak a pangngai chhoh hunah state dang nena inkalpawhna chu hawn chhoh tum a nih thu Khandu chuan a sawi. State danga tangkhan haw hi mi 8,000 chuang an awm tawh a, June 20 thlengin mi 5,000 haw tur a la awm tih a sawi bawk. Zirna in hawn tur chungchangah pawh sorkar chuan stakeholder hrang hrangte rawnin a la ngaihtuah dawn a ni, a ti. 

Education deptt. chuan Class 6-8 inkar tan DD channel Arunprabha kaltlangin online class a kal­pui mek a, All India Radio kaltlangin pawl hniam zawk tan buatsaih a ni dawn bawk tih CM chuan a sawi.