AP-in August thla laihawlah Vaccine 100% pek hman tum

Arunachal Pradesh chief minister Pema Khandu chuan Ningnani khan district hrang hrang thuneitute leh health department hotute kawmin, August thla laihawlah chuan vaccine dose khatna a la thei chin hnenah pek kim hman vek tum turin a chah.

CM Khandu hian a office aṭangin 6th e-Pragati virtual meeting hi neiin, district thuneitute hnenah chuan vaccine pek chhuah kalpui mekah, electoral roll leh popu­lation census behchhana hman aiin, an bial chhunga la thei zat mimal chhiar mai chu a ṭangkai zawk tih a sawi. District ṭhenkhat electoral roll-a chuang, mahse khawpui leh district danga khawsa eng emaw zat an awm avangin vaccine peknaah hian electoral roll chu behchhana hmang lo turin a ti a, hei vang hian headcount chu hman zawk mai a ṭha a ni, a ti.

District tam zawkin an huam chhunga awmte zinga vaccine la thei tur chhiar fel a, an vaia vaccine pek kim an nih theihna turin hma an la chu lawmawm a tih thu CM chuan a sawi. District dang pawh July thla chhungin vaccine la thei chin zat hre fel hman turin a ti bawk a ni.

Vaccine an mamawh ang an nei tih sawiin, Khandu chuan vaccine lak a ṭul zia mipuite zirtirna ṭha tak pe a, August thla laihawla puitling, kum 18 chin hnenah vaccine dose khatna chu pek kim hman tum turin a ti.

Chief Minister hian mee­ting-ah hian web portal pawi­mawh tak pahnih a tlang­zarh nghal bawk. Pakhat hi education department pual niin, pakhat zawk chu Covid-19 status chungchang chiang zawka tarlanna tur a ni. Heng web portal pahnih te hi Infor­mation Technology depart­ment siam an ni.