Assam sorkar kutah NLFB hel 23 inpe

National Liberation Front of Bodoland (NLFB) helpawl hotu M Batha leh an pawl member member 22-te chu Ningani khan Assam sorkar kutah an inpe.

M Batha hi National Democratic Front of Bodoland (NDFB) helpawlah a tel ṭhin a, bomb siam leh a kam a thiam avangin 'bomb specialist' tia sawi ṭhin a ni. Kum 2020, January 30-a sorkar laipui, Assam sorkar leh NDFB hnuaia pawl paliten inremna, Bodo Accord an ziah khan hel 1,615 chu sorkar kutah an inpe a, an zingah hian Batha pawh hi a tel. Mahse kum khat dawn hnuah Accord kalpui a nih danah lungawi loin, Batha leh a hnungzuitute chu ram hnuaiah kirin an hel pawl hi an din leh ta a ni. Bodoland Territorial Regoin (BTR)-ah an chetla ber a ni.

Police-te kuta an inpek hma lawk hian National Investigation Agency (NIA) chuan Batha hi 'most wanted' ah puangin, man a nih theihna atan a awmna chin hrilh theih hnenah lawmman, cheng nuai 10 a phal a ni.

Ningania khan Udalguri district-a Lalpajni police station-ah an ralthuamte hnena Batha leh a hote hi an inpe a, he hunah hian Bodoland Territorial Council (BTC) hotu leh BJP thawhpui, United People's Party Liberal (UPPL) president Pramod Boro, Assam water resources minister Pijush Hazarika, chief minsiter political secretary Jayanta Malla Baruah leh special director general of police (law & order) GP Singh-te pawhin he hun hi an hmanpui bawk.

Chief minister Himanta Biswa Sarma chuan NLFB helte an inpe chu lawmawm a tih thu sawiin, hei hian sorkar policy-te an rintawk zia a tilang a ni, a ti. A kaihhruai sorkar chuan Bodoland hmasawnna tur leh, Bodi mipuite culture leh nihna te humhalhna tura theihtawp a chhuah zel tur thu a sawi.