Tripura MLA-in bawng humhalhna bill siam phut

Assam sorkarin state chhunga bawng humhalhna bill a siam hnuah, Tripura-a BJP MLA Sudhangshu Das chuan an state-a bawng humhalhna tur leh population control bill siam ve phutin, legislative assembly session-ah motion putluh a tum tih a sawi.

Fatikroy bial MLA Das chuan mihring pung chak lutuk venna tur dan siam a ṭul thu sawiin, "Assam leh Tripura chu an ram zau zawng nena teha mihring tamna ber zingah an tel a ni," a ti. Hei bakah hian bawng tawlhruk ṭhin venna tura bawng humhalhna bill pawh siam a pawimawh tih a sawi a ni.

"Tripura chief minister chuan state chhunga bawng tawlhru ṭhinte ngaihnathiam an ni dawn loh thu pawh a lo puang tawh a ni. Border security force-te pawh ramri kaltlanga bawng tawlhruk ṭhin chu tihtawp a nih theihna atan khauh zawka veng tur pawhin hrilh an ni tawh bawk," tiin Das chuan a sawi.

BJP MLA chuan, "Hindu sakhaw betuten bawng chu 'Pathian nu' anga ngaiin an bia a, mi tam zawkin an sakhaw rin dan venhimna tur an phut a nih chuan sorkar chu a ngawi reng thei lo a ni," tiin assembly session neih leh hmasa berah bawng humhalhna turin private member resolution putluh a tum chhan a sawi bawk.