Meghalaya leh Assam CM-ten ramri chungchang sawidun : Ramri buaina hmun 12-te tlawh dun an rel

Meghalaya chief minister Conrad K Sangma leh Assam chief minister Himanta Biswa Sarma-te chuan kar liamta Zirtawpni khan state pahnihte ramri buaina chungchang sawidunin official meeting an nei. Hei hi ramri chungchanga state pahnihten Chief Minister-level meeting an neihna hmasa ber a ni.

Shillong-a Secretariat-ah meet-ing hi neiin, Sangma chuan ramria buaina an neih mekna hmun 12 chu Meghalaya ram niin a sawi. Mahse Sarma chuan heng ramte hi Assam ram chin nia sawiin, document pawh an nei vek tih a sawi ve thung.

Hun eng emaw chen an sawidun hnuah, hruaitu pahnihte hian state pahnihten an pawm dun theih tur inremna siam dan kawng zawng a, ramri buaina awm mekna hmun 12 te pawh a mal te tea sawi that leh an rel. A remchan dan angin CM pahnihte hian heng hmunte hi a hmun ngeia kala tlawh dun an rel bawk.

Chief Minister pahnihte hian August 6-ah Guwahati-ah ramri chungchangah hian meeting an nei leh dawn a ni.

Meeting zawh hnuah chanchinbu mite a kawmnaah, Sarma chuan inbiakna hlawkthlak tak an neih thu leh, state pahnihte ramri buaina pawh chingfel tura theihtawp an chhuah tur thu a sawi. Hemi rual hian ramri chungchangah thu inhmu lo a awm avangin uluk zawka sawiho a ngai dawn a, state pahnihten an ram chin nia an dante pawh sawiṭhat leh a ngai tih a tarlang bawk.

Meghalaya CM pawhin ramri buaina hi hun rei tak chinfel loha awm tawh a nih avangin a chinfelna atan pawh hun a duh deuh maithei tih a sawi. Hemi rual hian inremna tluantling erawh an siam theih ngei a beisei thu a sawi.

Ramri inchuhnate hi chinfel thuai a nih loh chuan buaina leh tharum thawhna hialte a thlen phah fo tih Sangma chuan a sawi. A chinfel hi thil awlsam tak ni dawn lo mah se, mi hrang hrangte rawn kualin, history leh data an neih sate pawh en tel vek a ni dawn tih a sawi a ni.

CM-level meeting-ah hian Assam chief secretary Jishnu Barua, director general of police Bhaskarjyoti Mahanta, Meghalaya chief secretary M.S. Rao, additional chief secretary R.V. Suchiang, commissioner and secretary R. Lyngdoh leh secretary (Home and Political) C.V.D. Diengdoh-te an tel ve bawk.

Assam hian a ṭhenawm state parukte chu ramri chungchangah buaina a neihpui vek a, tun hnaiah hmun ṭhenkhatah buainate chhuakin, central para-military force-te dah an ni.