HC thupekin Manipur journalist chhuah ve leh ta

National Security Act (NSA) hnuaia thubuai siamsaka Manipur Central Jail, Sajiwa-a tan tir, journalist Kishorechandra Wangkhem chu Manipur High Court thupek angin Zirtawpni liam ta khan chhuah a ni ve leh ta.

Wangkhem hi May 13 khan political activist Erendro Leichombam nen Covid -19 vanga Manipur BJP president S Tikendar a thih hnuah, bawng ek leh zunin Covid hri a tidam thei loh tih Facebook-a an sawi avangin man an ni.

Supreme Court thupekin Leichombam hi a hmain chhuah a lo ni tawh a, a chhuah hnuah Wangkhem nupui, Ranjita Elangbam chuan a pasal chhuah ve tura phutin Manipur High Court-ah petition a thehlut ve leh a ni. A ngenna hi Zirtawpni khan chief justice PV Sanjay Kumar leh justice Kh Nobin awmna High Court bench chuan ngaihtuahin, hemi ni vek tlai dar 5 hmaa chhuah turin Manipur sorkar chu a hriattir nghal a ni.

Wangkhem chuan man a nih chhunga a thil chan zawng zawngte zangnadawmna pek a phut tih sawiin, Supreme Court-ah a thlen dawn tih a sawi. "Hetiang hi midang chungah pawh a thlen tawh loh ka duh a ni. A hmain NSA hnuaiah vek thla li leh a chanve hren ka ni tawh a, tun tumah hian thla hnih hren ka ni leh a ni," a ti.