Manipur-in March 31 thleng zirna in khar

Manipur governor Najma Heptulla chuan Inrinni khan state chhunga zirna in hrang hrang, university te pawh huam­in March 31 thleng khar a nih tur thu a puang. 

Governor chuan zirna in khar a nih chhan hi tunlaia hri leng mek, Covid-19 laka invenna kawng khat atan tih a nih thu a sawi. Inrinni thleng khan Manipur-ah hian mi 412 te an hriselna dinhmun enthlak zui atan dahhran an ni tawh a, mahse tun thlengin an state-ah hian Covid-19 kai hi hmuh an la awm lo. 

Manipur-a Bishnupur district thuneitute chuan kar liam ta Inrinni khan, tunlaia khawvel puma hri leng mek, Covid-19 laka invenna kawng khat atan district chhunga mi 100 aia tam punkhawm khapna thupek an tichhuak. 

Bishnupur deputy commi­ssioner Neeta Arambam chuan he thupek hi hman nghal a ni tih sawiin, state sorkarin hri leng avanga state of emergency a puan hma chuan hman chhunzawm a ni dawn tih a sawi. Khapna thupek hian hun pawimawh bik, inneih, chhung­kaw thiltih te erawh a huam tel lo ang. Sorkar programme hrang hrang pawh loh theih loh chauh neih tura tih niin, heng pawh hi DC phalna lak phawt a ngai dawn a ni. 

Tripura sorkar chuan Inrinni aṭang khan an state-ah ram dang khualzinte luh a khap ve leh a, hmarchhak state zingah ramdang mi luh khapna thupek siam state pangana a ni. A hmain Sikkim, Arunachal Pradesh, Mizoram leh Manipur-te chuan ramdang khualzin luh an lo khap tawh bawk. 

Immigration centre hrang hrang - Agartala (Akhaura), Srimantapur, Muhurighat, Khowai leh Raghna kaltlanga ramdang khualzinte luhtir chu tihtawp a ni rih dawn a, hemi rual hian ramdanga tangkhang mek, India mite erawh chuan heng entry point kaltlang hian an luh phalsak an ni thung ang.