Sports infrastructure tihchangtlunna atan Meghalaya sorkarin Rs vbc 450 a ruahman dawn

Meghalaya chief minister Conrad Sangma chuan a kaihhruai sorkarin an state-a sports infrastructure tihchangtlunna turin cheng vaibelchhe 450 a ruahman dawn tih a sawi. 

State sorkar chuan Tura-a PA Sangma stadium chu integrated sports complex-a siamna turin hmalak ṭan tawh a ni a, he hmun hi football tan bik ruahman a ni dawn tih CM chuan a sawi bawk. "Sorkar chuan sports lam a ngai pawimawh a, kum hnih chhungin state chhung hmun hrang hrangah sports infrastructure siamna turin cheng vaibelchhe 450 chuang a dah dawn a ni," a ti. 

State chhungah infiamna, a bikin football chawi lar tumin sorkar chuan hma a la dawn a, hemi atan hian Shillong-a international level football academy hawng turin an inbuatsaih mek tih CM chuan a sawi.