Manipur-in A vawikhat nan hmeichhia Chief Justice nei

Gujarat High Court judge Justice Abhilasha Kumari chuan Zirtawpni khan Manipur High Court Chief Justice ni turin rinawmna thu a tiam.

Kumari hian he post hi ni 13 chiah a chelh dawn thung a, February 22 hian a pension dawn a ni.

Manipur Governor Dr. Najma Heptulla chuan Imphal-a Raj Bhavan-a Durbar Hall-ah Kumari hi rinawmna thu a tiamtir a ni.

Kumari hi Manipur High Court in Chief Justice hmeichhia a neih hmasak ber a ni a, Himachal Pradesh mi niin Delhi University aṭangin a graduate a ni. Himachal Pradesh University aṭangin law degree a hmu a, 1984-ah bar-ah ṭhu ṭanin Himachal Pradesh High Court-ah law a practice thung.

Rinawmna thu a tiam hnu hian Abhilasha Kumari chuan hun rel lote chhung Chief Justice a nih chhungin a theihtawp a chhuah tur thu a sawi a, state mipuite lawmna thlen a tum thu a sawi bawk.

Kumari chuan hun rei lo te chauh Chief Justice ni dawn mah se hmeichhe tan dinhmun sang takah a din theih a ni tih lantir tlat a tum thu a sawi.

Chief Justice tharin rinawmna thu a tiam lai hian Chief Minister N Biren Singh, deputy chief minister Y Joykumar, Ma­nipur Assembly spea­ker Y Khemchand, opposition leader chief minister hlui Okram Ibobi Singh, chief minister hlui Radhabinod Koijam, chief secretary, DGP leh sorkar official pawimawh eng emaw zat bakah police leh bar member eng emaw zat an tel bawk a ni.