Manipur-ah AR-ten thingzai truck 12 man

Manipur Thoubal district-a duty Assam Rifles-te chuan a ruka thingzai hralh tur phurtu truck 12 an man thu Zirtawpni khan an sawi.

Assam Rifles-te chuan an thudawn bawhzuiin IGAR (South) hnuaia 9 Sector Assam Rifles-te chuan Thoubal-Hongbi kawngah truck 12 an man thu an sawi a, heng an truck man te hi thu an zawhfiah hnuah Forest department-te hriatpuina tel loin an phur tih an manchhuak tih an sawi bawk. Truck 12 an man thu hi SP, Thoubal Police leh DFO, Thoubal-te hnenah an hriattir nghal a, dan anga hma la turin Police-te kutah an hlan nghal thu an sawi bawk.

Heng truck 12-te hian thingzai 388 vel an phur a, heng zawng zawng hi Assam Rifles-te chuan Divisional Forest Department, Thoubal kutah an hlan vek niin an sawi. Hemi hnu lawkah hian Molam a bawlhhlawh paihna bulah thingzai 40 an man leh bawk.

Assam Rifles-ten thingzai an man zawng zawng hi cheng nuai 40 man hu vel a ni.