Amit Shah-a'n Meghalaya-a water supply scheme a hawng

Union home minister Amit Shah chuan Pathianni khan Meghalaya-a ‘Greater Sohra Water Supply Scheme’ a hawng. He scheme hi East Khasi Hills district-a cheng mi 20,000 chuangin an chhawr thei dawn a ni.

Project hawnna inkhawm, Shillong-a neihah hian chief miniter Conrad K Sangma leh state official dangte an tel. He scheme hi state sorkar siam niin, Ministry of Development of North Eastern Region (DoNER) chuan a senso tur, cheng vaibelchhe 24.08 a tum sak ang.

Amit Shah chuan prime minister Narendra Modi kaihhruai NDA sorkar chuan chhung tinte hnenah tui thianghlim in tur pekna turin theihtawpin hma a la zel tih a sawi. India Independence Day vawi 75-na thlen hmain chhung tinte hnenah tap water connection hi pek hman a tum a ni, a ti.

‘Greater Sohra Water Supply Scheme’ hmang hian Wah Lyngksiar tui leh hmun danga mi lak tum a ni a, hei hi East Khasi Hills district-a Sohra khua leh a ṭhenawm khua 12-te hnenah pek a ni ang.