AIM-in vaccine lak luih tir duh lohna lantir

Awaken Indian Movement (AIM) chuan Meghalaya sorkarin Covid vaccine lak vek tura a tih leh lockdown a puan duh loin Inrinni liam ta khan Shillong-ah lungawi lohna an lantir.

Khuahkhirhna siam vangin AIM-te hi kawng zawh phalsak an ni lo a, hei vang hian Mothphran parking lot-ah nawrh hi an huaihawt a ni.

AIM member Banshai Marbaniang chuan state sorkarin vaccine la vek tura a ti chu an dikna chanvo lakbo sakna nia sawiin, vaccine la lote laka dan siam chu inthliarhranna a ni, a ti bawk. Vaccine la lote chu thuneitute chuan ni 10 danah test nei turin an ti lui ziah niin a sawi. Hnathawktute pawh vaccine la tura nawrin, an lak loh chuan banahte vau an ni, a ti.

Marbaniang chuan lockdown puanin mipuite a nghawng dante sawiin, sorkarin ṭanpuina leh chhawmdawlna a pek loh chuan nitina inhlawhfa ṭhinte tan pawn chhuah khap engtinge an khawsak zel ang, tiin a zawt bawk.

Nawrh huaihawtte hi North Shillong MLA Aldelbert Nongrum chuan a thlawp thu a sawi bawk a, "Vaccine la tura innawr luih hi kei pawhin ka thlawp lo a ni," a ti. Mitinte zalenna neih chu zahsak a ni tur a ni tiin, vaccine la duh lote la ngei tura nawr luih chuan an rilru thlengin a nghawng thei a ni, tiin a sawi.

Meghalaya sorkar hian vaccine la thei chinte chu kumin chhungin 80% tal pek hman tumin hma la mah se, vaccine la duh lo eng emaw zat an awm avangin harsatna an tawk a ni.