Assam Congress MLA Borgohain-a'n BJP zawm dawn

Assam Congress MLA Sushanta Borgohian chuan August 2 hian rorellai, BJP a zawm dawn

Thowra bialtu MLA, Borgohain hian Congress party aṭanga banna thehluh thuai a tum tih a sawi. BJP kaihhruai sorkar thar a din leh hnua Congress MLA zinga BJP zawm tur pahnihna a ni. June thla khan Mariani bial MLA, Rupjyoti Kurmi chuan Congress chhuahsanin BJP hi a lo zawm tawh bawk.

Assam Congress party hotu thar, Bhupen Bora chuan chief minister leh BJP hruaitu Himanta Biswa Sarma chu eptute MLA-te BJP zawm tura thlemah puhin, ram danpui ngai pawimawh lo zawnga thu sawiah a puh. CM Sarma hian June thlaa Congress MLA Kurmi'n BJP a zawm hnu khan eptu MLA zawng zawngte chu rorlelai BJP zawm vek turin a lo sawm tawh a ni. Bora chuan, "Mi ṭhenkhat party awmna thlak ching an awm ve fo. Hetih laia chief minister-in an party awmna phatsan a, party dang zawm tur zawnga a lo fuih hi thil zahthlak tak a ni. CM-in MLA-ten hna engmah an nei lo tia a sawi pawh hi kan ram danpui ngaih pawimawh lohna lian tak a ni," a ti.

Bhupen Bora hi Assam Pradesh Congress Committee president thar atana ruat niin, party hotu nilai, Rajya Sabha MP Ripun Bora a thlak dawn a ni. Ripun Bora hian tun kar chhung hian Bhupen Bora hnenah charge hi a hlan ang. Ripun Bora hian state assembly inthlanah an party an chet ṭhat tawk loh avangin May 2 khan party chief a nihna aṭangin banna a lo thehlut tawh a ni.