Assam-in Mizoram border 3-ah Police commando battalion 3 dah dawn

Assam chief minister Himanta Biswa Sarma chuan nimin khan Assam-Mizoram ramri buaina thleng chungchang chu Supreme Court-ah an thlen dawn tih a sawi.

Thawhṭannia ramria state pahnih police-te inkahna thlengah Assam lamah police panga leh civil mi pakhat an thi a, hliam tuar eng emaw zat awmin an zingah hian SP pawh a tel niin a sawi.

Chief Minister hian nimin khan Silchar-ah press confe-rence neiin, Mizoram nena an inrina, Cachar, Karimganj leh Hailakand-ah police commando battalion thum an dah dawn tih a sawi a, "He buaina neihna hi mihring chenna hmun a ni lo a, reserved forest chungchang zawk a ni. Assam chuan a ramngaw hi a venghim tlat dawn a ni," tiin an ram chu inches khat pawh an ṭhenawm state-ten an luahsak an remti lo tih a sawi. Reserved forest-ah hian tumah chen tir an tum bik lo tih sawiin, satellite image aṭangin reserved forest chhungah hian kawngpuite siamin, lo neihna atante hman a ni tih a lang a ni tiin, hei hi phal a ni lo tih a sawi bawk. Mizoram-in an ram chin tih finfiahna a pe thei a nih chuan, forest area-a awmte chu an chhuahtir nghal tur thu a sawi bawk a ni.

"Ramri buaina hi hun rei tak aṭanga awm tawh a ni. Congress sorkar lai pawha awm tawh a ni. Political party pahnih inkar buaina ni loin, state pahnih inkar buaina a ni," tiin Assam CM chuan a sawi. Buaina a chhuah hnuah sorkar laipuiin border post aṭanga police-te lachhuak tura a tih angin post aṭanga meter 100-ah an police-te hi an dah chhuak a, Mizoram lam erawh chuan an lachhuak ve lo niin a sawi.

Thawhṭannia ramria buaina chhuak thi, mi paruk chhungte chu state sorkarin zangna-dawmna cheng nuai 50 ṭheuh leh, hliam tuarte chu cheng nuai khat ṭheuh pek an nih tur thu Sangma chuan a sawi bawk.

Police thite ni 3 chhung sun dawn
Assam sorkar chuan Thawh-ṭannia Assam-Mizoram ramri buaina chhuaka thi, police panga leh civil mi pakhat chu nimin aṭang khan ni thum chhung sun an ni dawn tih a puang.

Thite sunna hun hman chhung hian sorkar office leh hmun pawimawh hrang hrangah hnam puanzar a ngul chanvea zar a ni ang a, hemi chhung hian intihhlimna lam hawi chi buatsaih khap a ni tih General Administration Department thuchhuah chuan a tarlang.

Chief minister Himanta Biswa Sarma chuan nimin khan Silchar-ah police thite zahna lantirin pangpar a dah a, Silchar Medical College and Hospital-ah hliam tuarte a tlawh nghal bawk.

Congress-in committee din
Congress party chuan state pahnih ramri buaina thlen chungchangah thil awmdan zirchiang turin member pasarih awmna committee a din nghal. Committee hian Cachar leh hmun dangte tlawhin, ramri buaina thlen dan chungchangte an enfiah dawn a, party interim president Sonia Gandhi hnenah report an theh lut ang.

Committee member-ah hian Assam Congress chief Bhupen Bora, Assembly-a party hruaitu Debabrata Saikia, Gaurav Gogoi, Pradyut Bordoloi, Sush-mita Deb, Rockibul Hussain leh Kamalakhua Dey Purkhaysatha-te ruat an ni.