Border issue: Meghalaya sorkarin all-party committee din remti

Meghalaya-a National People's Party (NPP) kaihhruai MDA sorkar chuan political party hrang hrangte phut angin, state border buaina an neih mek chungchangah all-party committee din a remti.

NPP state president leh Rajya Sabha member WR Kharlukhi chuan all-party committee din a nih tur thu hi a sawi a, hei hi an state-in ramri buaina an neih hrang hrangte chinfelna tur kawng zawnnaah thil pawimawh anih thu a sawi bawk.

Congress MLA Ampa-reen Lyngdoh chuan all-party committee din hi a rawt hmasa a, hei hi party hrang hrangte an thlawp nghal a ni. Ampareen chua party hrang hrang aiawhte an tel loh chuan, chief minister chauh chuan Meghalaya ramri buaina chu a chingfel mai thei bik dawn lo a, hei vang hian party hrang hrangte duhdan leh ngaihdante lak tel a ngai a ni, a ti.

State ramri buaina an neih mek chu chinfel thuai a nih loh chuan ngaihsak zui lohin tihkhawtlai a ni leh mai dawn tih a sawi a, "Assam CM leh kan CM ngeiin buaina chinfel an duh thu an sawilang tawh a, boruak pawh a ṭhat chhoh theih ngei kan ring a ni," a ti. Buaina chinfel a nih loh chuan ramri hrula cheng, an mi leh sate chuan buaina tawkin, harsatna an tawk leh zel dawn tih a sawi bawk.

United Democratic Party (UDP) pawhin ramri buaina chinfel thuai a ṭul thu hi sawiin, buaina chinfel theihna a nih chuan 'give and take' policy hman mai pawh a ṭul tih an sawi. Hemi rual hian state pahnihte hian an ngaihdan leh duhdante inhrethiam tawn chungin inremna an siam a ngai a ni, tiin UDP general secretary Jemino Mawthoh chuan a sawi.

Mawthoh chuan ramri chungchangah hian state pahnihte hian high-level meeting pawh lo nei fo tawhin, sorkar laipui hnenah pawh boundary commission din tura phutna resolution pawh an lo pass tawh a, mahse sorkar laipui hian state kutah a dah let zel a ni, a ti.