Nagaland : Candidate 195 awm, Chuhpuitu nei loin Rio a tling

Nagaland State Election Commission chuan Nimin khan thuchhuah siamin state Assembly inthlan hunah candidate 195 an awm dawn tih an sawi.

Hetih lai hian Chief Minister hlui leh Lok Sabha MP ni lai, Neiphiu Rio, Northern Angami II Assembly Constituency-a ding tur chu a khingpui Chupfou Angami a inhnuhdawh leh tak si avangin chuh­puitu neiloin a tling nghal a ni.

Party thar Nationalist Demo­cratic Progressive Party (NDPP) president Neiphiu Rio chuan inthlan buai ngai loa hnehna a chang chu lawmawm a tih thu sawiin mipuite hnenah lawmthu a hrilh nghal a ni.

NDPP hian BJP nen thawhhona thutlung an siam tawh a ni.

Nagaland inthlan huna din tum zinga candidate 32 an inhnukdawk leh a, Pathianni thleng khan in­hnuh­dawh lehna hun an nei a ni.

Nagaland inthlan huna party hrang hrang candidate neih dan tur chu hetiang hian a ni ang : NPF- 58, NDPP-39, BJP-20, INC-18, NPP-25, JD(U)-13, NCP-6, AAP-3, LJP-2 leh Independent -11.

Seat 60 awmna Nagaland Assembly inthlan hi February 27 hian neih a ni dawn a, March 3-ah result puan a ni thung ang.