Manipur fake encounter chhuitu SC in duhkhawp lo

Supreme Court chuan Thawhṭanni khan thuchhuah siamin, Central Bureau of Investigation (CBI) hnuaia Special Investigation Team (SIT) din ten Manipur-a sipai, Assam Rifles leh police-te fake encounter case leh inthahna report dik lo awm nia puh an chhui dan chuan an duhthu a sam lo hle tih an sawi.

Apex court in SIT-te hi case 42 ziahluh a awm thu a hrilh a, Justices M B Lokur leh U U Lalit-te kaihhruai bench chuan National Human Rights Commission (NHRC) chu SIT-te ṭanpui tur mi pathum ruatchhuak turin an ti bawk a, anni ho hi case 42 zinga 17 chhuichiang tura thupek an ni.

Bench lam chuan SIT-te hmalaknaah hmasawnna em em a awm lo niin an sawi a, an hmalak danin an duhthu a sam loh thu an sawi bawk.

Bench chuan SIT-te report thehluh chu CBI Director pawmpuina tel lo a nih thu an tarlang a, hemi a nih avang hian an lawm loh thu an sawi bawk a ni. Report an thehlut leh dawn a nih chuan CBI Director pawmpuina nen thlapa thehlut tawh turin an ti a ni.

Court chuan case hi March 12-a ngaihthlak leh a nih dawn thu a sawi.

Apex court hian January 16 khan SIT-te chuan an mamawh ang zat FIR an thehlut lo niin an lo sawi tawh a ni. Court hian kum kalta July 14 khan Manipur fake encounter case chhuichiang tur CBI officer panga awmna SIT hi a din a ni.