Manipur-ah Air Dispensary hmang ṭan ṭep : CM

Manipur Chief Minister N. Biren Singh chuan Thawhṭanni khan Manipur tan air dispensary ṭan ṭep a nih thu a sawi.

Air dispensary hi helicopter/thlawhna hmanga medical service siam a ni a, sorkar laipui chuan helicopter hmanga dispensary/OPD service siam a tum thu a lo sawi tawh a ni. Air dispensary hi hmun kal-pawh har leh tlangram, medical service awm ṭhat lohna hmunah te ṭangkai taka hman theih beisei a ni bawk.

Health department official thuchhuah chuan air dispensary service hi Meghalaya-ah pawh hman a nih dawn thu an tarlang tawh a, Manipur Chief Minister hian an state-ah disoensary service hi hmanṭan a nih thuai dawn thu Manipur Assembly-ah a sawi a ni.

Manipur Governor Najma Heptulla chuan dispensary neih tura ruahmanna awm chu a idea a nih thu sawiin Australia a tlawh aṭanga hetiang idea a neih thu hi a sawi a, a haw leh hnuah Prime Minister Narendra Modi hnenah Manipur-ah air dispensary service hi siam tura a ngen thu a sawi bawk.

Heptulla chuan hmun kilkhawr zawkah medical care ṭha a awm loh thu sawiin Prime Minister pawhin a theihtawpa ṭanpui a inhuam thu a sawi niin a tarlang.