Inter-Ministerial team-in AP tlawh

Sorkar laipui hnuaia inter-ministerial team, mi pasarih awmna chuan disaster management chungchangah Thawhṭanni zing khan Arunachal Chief Minister Pema Khandu chu a office-ah meeting an neihpui.

Inter-ministerial team hi Ministry of Home Affairs Joint Secretar Prakash-a'n a ho a ni.

Mi pasarih awmna team hi Arunachal Pradesh-ah hian ni hnih an cham dawn a, Arunachal in khuarel chhiatna thleng avanga thil tam tak a hloh enfiah tur leh sorkar laipuia report an thehluh huna hmalak dan tur thurawn pawh an pe nghal bawk ang.

Meeting an neihnaah hian Parliamentary Secretary for Disaster Management Kaling Moyong, Chief Secretary Satya Gopal leh Secretary Disaster Management Bidol Tayeng-te pawh an tel.

Chief Minister chuan inter-miniterial team-te hnenah hian Arunachal Pradesh in khuarel chhiatna vanga buaina an tawh nasat ṭhin thu a hrilh a, an state mal tana thiltih a harsat thu leh chhiatna thlengin thil tam tak a tihchhiat te chu sorkar laipui ṭanpuina tel lo chuan siamṭhat leh kawnga hma lak a harsat thu a sawi.

Pema Khandu chuan kum kalta chhung khan khuarel chhiatna hrang hrang thlenga mi 40 aia tamin nunna an chan thu a sawi bawk a, fur laia chhiatna a thlen nasat ṭhin thu sawiin furpui zawh velah Arunachal-a zin leh turin leh thil awmdan enfiah tura a duh thu te a hrilh a ni.

Team leader MHA Joint Secretary Prakash pawhin Arunachal Pradesh dinhmun chu a hriatthiampui thu sawiin, chhiatna hrang hrang thlengin thil a tihchhiatte siamṭhat leh hna thawh chu state sorkar tan pawh chona lian tak a nih thu a sawi.

CM in furpui zawha tlawh leh tura a sawmna pawh chu ṭha a tih thu a sawi bawk.

Chief Secretary Satya Gopal chuan kum kalta chhunga khuarel chhiatna thlengin thil a tihchhiat zawng zawng chu cheng vaibelchhe 1037.61 hu a nih thu a sawi. Chief Secretary chuan sorkar laipui hnenah ṭanpuina pe turin a ngen nghal bawk a ni.