Assam-Meghalaya ramri-ah Electric ban phun vangin buaina chhuak

Assam leh Meghalaya ramriah electric ban phun chungchang avangin buaina a chhuak a, mahse buaina nasa zawk a chhuah hmain an thunun thei tih official chuan a sawi.

Thawhṭanni khan Meghalaya lam miten Assam ram chin, Khanapara area-ah electric ban phun an tum nia sawi a ni a, thu an dawn veleh Assam police leh civil official-te chu kal nghalin, Meghalaya lam thuneitute nen an sawiho nghal tih an sawi a ni.

Hetih lai hian Meghalaya lam chuan an state-a Ri Bhoi district huam chhunga Iongkuli khuaa MeECL-in electric ban an phun chu Assam police-te hian an tihchhiat sak niin an puh thung. Tualchhunga pawl hrang hrangten duh lohna an lantir chu Assam police-te hian ngai pawimawh loin, Member of District Council (MDC) Charles Marngar pawh an khawih hial niin an sawi.

Marngar chuan, "Thil thlengte enfiah tura ka kal chu Assam police-te hian min lo nawr sawn a ni. Tunah erawh chuan buaina hi kan thunun tawh a, mipuite pawh inbengdai turin ka ngen a, state sorkar hnenah he thil thleng chungchang hi ka thlen dawn a ni," a ti.

Assam leh Meghalaya hian hun rei tak ramri chungchangah buaina an nei tawh a, tun hnaiah state pahnih chief minister-te hi Shillong-ah inbiain, ramri buaina chungchangte pawh an lo sawidun tawh a ni.

Ionkhuli khuaa tualchhung mite leh Assam police-te inkara buaina a thlen hnuah, United Democratic Party (UDP) chuan state sorkar hnenah a thil dah pawimawh zawngte ngaihtuah ṭha tura phutin, an ram chin humhim chu sorkarin a ngaih pawimawh ber a ni tur a ni, an ti. "District leh sub-division thar siam belhte hi ngaih pawimawh ber tur a ni lo. State ramri chin venhim hi sorkar ngaih pawimawh ber a ni tur a ni," tiin UDP working president Paul Lyngdoh chuan a sawi.

Chief minister Conrad K Sangma hnenah pawh an state ramri vengtu tur, border police siam a ṭul thu pawh an party chuan an thlen tawh tih sawiin, Meghalaya state-in kum 50 a tlin hma ngeiin border police battalion pahnih din tura rawtna an thlen thu a sawi bawk.

Sorkarin Assam border-ah police outpost siam dawn
Chief minister Conrad K Sangma chuan Assam border-ah police outpost eng emaw zat an siam dawn tih a sawi a, outpost siamna tur hmun pawh hi sorkarin a tifel tawh a ni, a ti.

CM chuan ramria buaina an neih lohna hmunah outpost hi siam ani dawn tih a sawi a, hemi rual hian ramri buaina an neih mekna hmunah outpost siam chungchang erawh Assam nena an inbiak dan azirin kalpui a nih tur thu a sawi.

Iongkuli khuaa tualchhung mit leh Assam police-te inkara buaina thleng chungchang chu Assam chief minister Himanta Biswa Sarma a sawipui tawh tih sawiin, Sangma chuan boruak ṭha leh muanawm a awm theihna tura theihtawp chhuah an duh thute pawh an sawidun tih a sawi bawk.