Nagaland, Mizoram, Meghalaya, Manipur & Arunachal Pradesh Youth Congress President-ten assam CM an dem rawn

Hmarchhak state panga-a Youth Congress President-te chuan nimin khan thuchhuah inṭawm siamin, Assam sorkarin a ṭhenawm state-te a do leh, an laka tharum leh tihluihna a hmang fo chu an dem thu an sawi.

Nagaland, Mizoram, Meghalaya, Manipur leh Arunachal Pradesh Youth Congress President-te chuan Assam chief minister-a Himanta Biswa Sarma a awm hnu aṭangin ṭhenawm state-te a nekbehna a hluar chho a, police chakna hmanga nawrna pawh a tam chho leh a ni, an ti.

Assam sorkar chet dan avangin Assam ṭhenawm state-a civil mite chuan an tuar nasa a, an lo leh thlaite bakah infrastructure thlengin Armed Assam Police-te chuan an tihchhiatsak bakah, civil mite hi an rikrap fo a ni, tiin thuchhuah an siamah an tarlang. Hetianga thil thleng fo hian hmarchhak mipuite zingah inhuatnate siamin, hmarchhak state-te inunauna leh pumkhatna chu nasa takin a tichhia niin an sawi.

Ramria buaina hluar zel chu North East Democratic Alliance (NEDA) hlawhchhamna nia ngaih thu Youth Congress President-te chuan sawiin NEDA chu hmarchhak state-te hmasawnna leh inpumkhatna tura din a nih lohzia a rawn tilang chiang leh a ni, tiin BJP kaihhruai NDA-in eng kawng zawng pawha hmarchhaka thuneihna an chan theihna tura din a ni, an ti.

Assam Chief Minister Himanta Biswa Sarma-a'n buaina tipunlun zawng leh a ṭhenawm state-te tihhmingchhiat tuma hma a la chhunzawm zel chu an dem thu sawiin, thil awmdan dik tak zawk chu a CM-na hnuaiah boruak a ṭha lo zual a, Assam-in midang a tihbuai pawh an pung zual a ni tiin hmarchhak state-te inkar boruak chhe zual zelah a mawhphurhtu berah an ngaih thu an sawi bawk.

A chet duh dan aṭangin Himanta Biswa Sarma chu Assam chief minister ni tlaka an ngaih loh thu leh, BJP hruaitute chuan Chief Minister a nihna aṭanga ban ngei tura an phut thu sawiin, hei hi hmarchhak bialte boruak muanawm leh inrem tlang taka an awm leh theihna tur a ni tiin state panga Congress ṭhalai hruaitute chuan an sawi a ni.