India state zingah Assam-in state ramri buaina ngah ber

Union home ministry data-in a tarlan danin, Assam chu India ram state zingah state ramri buaina ngah ber a ni.

Thawhlehnia Lok Sabha inkhawma Bahujan Samaj Party MP, Haji Fazlur Rehman zawhna ziaka zawhna a chhanah, minister of state for home affairs Nityananda Rai chuan Assam hian a ṭhenawm state - Arunachal Pradesh, Nagaland, Meghalaya leh Mizoram chu state ramri chungchangah buaina a neihpui mek a ni, a ti.

Union minister chuan India rama ramri chungchanga buaina neih mekte chu - Haryana-Himachal Pradesh, Laldakh-Himachal Pradesh, Maharashtra-Karnataka, Assam-Arunachal Pradesh, Assam-Nagaland, Assam-Meghalaya leh Assam-Mizoram-te an ni tih a sawi bawk.

Assam-in ramri chungchanga buaina a neihpui mek zingah Nagaland, Meghalaya, Mizoram leh Arunachal Pradesh-te hi Assam aṭanga indang vek an ni.

Kum 1963 khan Assam aṭangin Nagaland state hi a indang a, kum 1972 khan The North-Eastern Areas (Reorganisation)Act, 1971 hnuaiah Meghalaya, Mizoram leh Arunachal Pradesh state hi din an ni ve leh a ni.