Assam police-ten ramri tlawh tum Congress team an dang

Assam police-te chuan Assam-Mizoram border-a tun hnuaia buaina chhuahna bula chengte kawm tura kal Assam Pradesh Congress Committee (APCC) team chu Thawhlehni khan Cachar district-a Lailapur an pan tur chu an dang a ni.

APCC member-te hian ramri dinhmunte enfiah tumin Thawhlehni zing khan an thawk chhuak a, mahse police-ten lo Dholai Bazar aṭanga an chhuak tur chu dangin, Lailapur an tlawh an tum chu 'security' thil avangin phal a ni lo tih an hrilh.

Cachar superin­tendent of police post thar, Ramadeep Kaur chuan boruak a la pangngai loh avangin mimal emaw, political party emaw pawh ni se, buaina chhuahna hmun leh a chhehvel hi tlawh phal a ni lo tih a sawi.

All India Congress Committee chuan ramria buaina a chhuah hnuah thil awm dan enfiah leh zirchiang turin APCC president Bhupen Kumar Borah kaihhruaiin committee a din thar a ni.

Ramri tlawha kal tum zingah hian CLP leader Debabrata Saikia, deputy CLP Leader Rakibul Hussain; APCC working president Kamalakhya Dey Purkayastha leh All India Mahila Congress president Sushmita Dev-te pawh an tel.

Silchar MP hlui Dev chuan chief minister, minister dang leh rorellai party hruaitute border area-ah kal phalsak an ni laiin eptu party hruaitute kal phalsak an nih lohna chhan tur bik a awm lo tih a sawi a, harsatna leh buaina siam tuma kal an ni lo tih a sawi bawk. "Congress party team chuan ramri dinhmunten enfiah a duh mai a ni," a ti.