Interstate border chungchang sawiho turin Meghalaya Special House session neih phut

Meghalaya-a Congress MLA Mayralborn Syiem chuan state sorkar hnenah interstate border chungchanga sawiho tura Assembly special session ko turin sorkar a phut.

Nongpoh bial MLA hian July 25 khan Assam police-te chuan Iongkhuli khuaa Meghalaya Energy Corporation Limited-in electric ban a phunte chu tihchhiat sak nia sawiin, "Kan mite thlabar taka an awm avangin ramri dinhmun leh thil thleng chungchangte sawiho turin sorkar chuan special session a koh thuai aṭul a ni," a ti.Autonomous District Council pathumte pawh special session nei tura a duh thu a sawi bawk.

MLA Syiem chuan Assembly speaker leh ADC-te hnenah a ngenna chungchang hi ziakin a thlen dawn tih a sawi bawk a, chief minister Conrad K Sangma leh Assam chief minister Himanta Biswa Sarma-te chu ramri chungchang sawidunin August 6 hian Guwahati-ah an inhmuh dawn avangin, special session hi neih thuai a ṭul a ni, a ti.

KHADC MDC leh officer-te chuan Irninni hian Iongkhuli khua hi an tlawh dawn a, tualchhung mite hnenah thil thlen dan kimchang an zawt ang. KHADC CEM Titosstarwell Chyne chuan Assam police-te an chetna hi an ram chin tih lanna document an nei nia sawi chu an pawm loh thu sawiin, he khua hi ram inchuhna lai pawh ni loin Meghalaya ram chhunga awm ngei a ni tih a sawi. "Assam police-te hi kan ram chhung ngeia rawn che a ni," a ti.

Khasi Students Union (KSU) chuan Assam sorkar an dem thu sawiin, ramri chungchanga buaina chu chinfel a duh takzet anih chuan Meghalaya lamin an duhdan leh an ngaihdante chu a zahsak tur a ni, tiin an sawi. KSU president Lambokstar Marngar chuan state sorkar pahnihte hian ramri hmun 12-a buaina an neihte chinfel an duh thu pawh an sawi tawh a, mahse a hnu lawka Iongkhuli khuaa thil thleng chu mak an tih thu a sawi.

Marngar chuan Assam sorkar chuan a nekchep reng tih sawiin, district thuneitute pawh an zah lo a, vawi tam tak tharum an hmangte pawh an hmu tih a sawi bawk. Kum 2010-a Langpih-a buaina thleng vanga mi pali thihna ang kha a thlen nawn an duh tawh lo tih sawiin, state pahnih sorkar chuan ramri buaina hi chinfel dan hi an ngaihtuah ngei tur a ni, a ti.