Assam-in Nagaland ramriah venhimna a tikhauh

Assam chuan Mizoram nena ramri chungchanga buaina an neih hnuah, Thawhlehni aṭang khan Nagaland state nena ramri buaina an neihna hmunah venhimna a tikhauh.

Jorhat-a senior police officer chuan Assam-Nagaland ramriah thil duhawm lo a thlen lohna turin security force-te chu inralring reng turin chah an ni tih a sawi. "Heng ramri buaina hmunahte hian dan leh thupek khauh taka kengkawh turin thupek kan dawng a ni," tiin buaina siam an awm palh theih bakah, ramriah hian helpawl hrang hrang an chetla fo tih a sawi bawk.

AP leh Assam SP-te inhmu
Thawhlehni vek khan Arunachal Pradesh leh Assam SP-te chu Changlang-ah inhmuin, state pahnih ramriah boruak muanawm a awm theihna tura thawhdun zel an remti. Ramri kaltlanga ruihhlo tawlh ruk ṭhinte pawh dang tura theihtawp chhuah zel an rel bawk.

Arunachal Pradesh leh Assam state ramri hi km 804.1-a thui niin, Assam district pariat - Udalguri, Sonitpur, Bishwanath, Lakhimpur, Charaideo, Tinsukia, leh Dibrugarh nen an inri a ni.

Ramri-ah hian tun hmain buaina a lo chhuak fo tawh a, state pahnihte hian ram inluahsakah an inpuh tawn bawk. Ramri buaina chingfel tur hian kum 1989 khan Supreme Court-ah thubuai ziahluh ani tawh a, mahse tun thlengin ngaihtuah fel a la ni lo.

Arunachal Pradesh chief minister Pema Khandu chuan Arunachal-Assam ramri buaina chu court kal kher ngai loa chinfel an tum tih a sawi a, ramri buaina chinfel dan buaipui tur hian state sorkar chuan High Powered Ministerial Committee (HPMC) pawh a lo din tawh a ni.