Assam Police-ten Mizoram aṭanga motor lut endik vek dawn State sorkarin mipuite Mizorama zin lo turin a chah

Assam sorkar chuan Ningani khan thuchhuah siamin, Mizoram aṭanga motor eng chi pawh lut chu Assam police-ten ruihhlo an phurh leh phurh loh an endik ziah tawh dawn tih a sawi. Mizorama zin chu a him lo nia sawiin, Assam mipuite chu zin lo turin a chah nghal bawk.

Tun hnaia Assam-Mizoram ramria buaina chhuak chung­changah, chief minister Himanta Biswa Sarma chuan he buaina chhuak hi Assam-a BJP sorkarin ruihhlo do beihpui a thlak nen inzawmna a nei thei nia sawiin, an hmalakna hian mi ṭhenkhatin ti thinurin ramri buaina thlengin a nghawng tel niin a sawi.

Assam sorkar chuan drug mafia leh an thawhpui, Myanmar aṭanga international border katlanga ruihhlo tawlhru ṭhinte chuan Mizoramah thurualpui ṭha tak an nei a ni, tiin a sawi. Assam sorkarin ruihhlo tawlhru tam tak leh a zuartute an man avanign ruihhlo tawlhruknaa inhnamhnawiha neih nia puh, Mizo politician-te a ti lawm lo hle niin a sawi bawk.

Mizoram aṭanga motor lut zawng zawng endik zel an nih tur chhan sawifiahin, Assam sorkar chuan thla hnih chhungin ruihhlo tawlhruk chungchangah thubuai 912 ziah luh ni tawhin mi 1,560 an man tawh a, ruihhlo ṭhahnem tak man a ni tawh bawk a ni, a ti.

Assam police official, GP Singh chuan Mizoram leh a piah lam aṭanga ruihhlo tawlhlut ṭhinte lakah beihpui an thlak chhunzawm zel dawn tih sawiin, an hmalakna chu ṭawiawm zel turin mipuite a chah bawk. "Ruihhlo do beihpui thlaknaah hian, ruihhlo tawlhlut tam zawk chu Mizoram kaltlanga Assam-a a lut tih hriat a ni, tiin a sawi.

Motor-te lutte hi endik vek a, officer-in ruihhlo an phur lo a ni tih a chian hnuah chauh an tlan tlang phal a ni ang tiin sorkar thuchhuah chuan a tarlang.

Mizorama zin lo turin mipuite chah
Assam sorkar chuan state ramria buaina a chhuah hnuah, Mizoram chu Assam mite tan a him tawk lo nia sawiin zin lo turin a chah bawk.

Home and political depart­ment chuan he thuchhuah hi siamin, Mizorama Assam mi hnathawka awm mekte pawh an himna ngaihtuaha fimkhur turin a chah bawk a ni.

Commissioner and Secretary, Home and Political Department, MS Manivannan chuan Mizo Civil Society, zirlai leh ṭhalai pawl ṭhenkhat chuan Assam leh Assam mipuite laka an lungawi lo leh thinurna thu an la chhuah fo a ni, a ti. " Assam Police-te hnen aṭanga video footage kan hmuh aṭangin civil mi tam tak chuan ralthuamte pawh an nei a ni," tiin a sawi.