HC-in Nagaland sorkar thupek a dan sak

Gauhati High Court Kohima Bench chuan Nagland sorkarin state sorkar hnathawkte Covid-19 vaccine la vek tura thupek a tihchhuah chu a dan sak.

State sorkar thupek chhuah chungchangah High Court-ah hian public interest litigation (PIL) thehluh a ni a, court chuan hearing neih leh hma chu he thupek hi hmang rih lo turin a dansak ta a ni. Kar hnih hnuah hearing hi neih leh a ni ang.

July 17 khan Nagaland sorkar chuan thupek tichhuakin, sorkar hnathawkte chu office an kal duh a nih chuan Covid-19 vaccine la vek turin a ti a, vaccine an la lo a nih chuan ni 15 danah test an neih ziah tur a ni, a ti bawk. Vaccine dose khatna pawh la la lo leh, ni 15 dana Covid-negative report entir tur an neih ziah loh chuan office kal khap a ni a, an kal loh chhung hian hlawh pek an ni dawn lo tih a sawi bawk.

Hearing neihnaah state sorkar chuan PIL hi hnawl turin a ngen a, mahse justice Songkhupchung Serto leh justice S Hukato Swu awmna bench chuan sorkar thupek hi 'stay' sakin, ngaihtuah leh turin a dah ta zawk a ni.