Tripura-a I-PAC team member-te bail dilna pawmsak

West Tripura district and sessions court chuan Indian Political Action Committee (I-PAC) member 23-te bail dilna chu Ningani khan a pawmsak a, Tripura police-ten petition an thehluh chu a hnawlsak bawk.

Political strategist Prashant Kishor kaihhruai IPAC member-te hi Tripura-a politics dinhmun leh Trinamool Congress (TMC) insawhngheh dan turte enfiah tura kal an ni a, mahse Thawhṭanni khan East Agartala police-te chuan an kalchhuah remti loin an lo hreng a ni.

TMC hruaitu, Derek O'Brien chaun IPAC member-te hian an party-in an chhawrte a nih thu sawiin, central lama hruaitute thupek angin Tripura police-te hian an lo man niin a sawi. Derek chuan, "Professional assigment avanga Tripura-a kal an ni a, mahse Delhi lam aṭangin Amit Shah leh Narendra Modi chuan IPAC member-te man turin an hrilh a ni," a ti. Modi leh Shah-te chuan Parliament-a eptute thusawi an phalsak lo ang bawkin, hmun dangah pawh eptu lam hrek zel an tum niin a sawi.