Assam-a BJP sorkar hnuah state ramri boruak a sosang : Meghalaya MP

Meghalaya Lok Sabha MP Vincent H Pala chuan prime minister Narendra Modi hnenah Assam-a BJP sorkar thar a din hnuah state ramri buaina a tam chhoh mai bakah, ramri boruak pawh a sosang zual hle tih a hrilh.

State ramria tihluihna leh innek behna awm thin hian inṭhenawm boruak tha tak awm tur chu a tichhia a ni, tiin Pala chuan a sawi.

Lok Sabha MP term thumna hmang mek, Pala hian Zirtawpni liam ta khan PM Modi hnenah lehkha thawnin, state inṭhenawmten inlaichinna ṭha an neih theihna tura inrawlh tur leh, a rang thei ang bera hma la turin a ti. "Hmarchhak bial hmasawnna turin hun rei tak kan bei tawh a, kan lo beih tawhnate thamral tir chu thil pawi tak a ni dawn a ni," a ti. Tun hnaia Assam-Mizoram border-a buaina chhuak leh, nunna chante an awm hial chuan hmarchhak biala remna leh muanna dinhmun derthawn zia pawh a tilang chiang hle tih a sawi.

Manipur leh Tripura tiam loin, hmarchhak state dangte chuan Assam nen ramri chungchangah buaina an nei vek a ni, tiin Meghalaya MP chuan a sawi bawk.

Meghalaya BJP minister-in Mizoram MP thusawi fak
Meghalaya labour minister leh BJP hruaitu Sanbor Sullai chuan tun hnaia Assam-Mizoram ramri buaina chhuak chungchanga Mizoram Rajya Sabha MP, K.Vanlalvena thusawi chu fakin, hetiang rilru hi Meghalaya mipuite pawhin an put ve a ngai a ni, a ti.

"Assam mite hian border area-a cheng kan mite hi an rikrap zel a nih chuan chet ve a hun, thingpui no dawma inbiakna neihah tawp ringawt loin, a hmunah ngei kan chet a ngai tawh a ni," tiin Labour Minister thar hian media miten an kawmnaah a sawi a ni.

Mizo mipuite pawh fakin, "Mizo mipuite huaisen leh tumruhna pawh in hmu a, hei hi an nihnaa an chian leh hmangaih vang a ni. Mipui leh police-te tanrualna chuan an mite an venghim a ni tih pawh a langchiang hle," a ti.

Tharum thawhna thleng chungchanga zawhna chhangin BJP hruaitu chuan, "I hmelma chu i inah lo kalin i nupui leh fate rawn bei sela, invenna tan i lo beih let a ngai a ni. Hetiang bawk hian ramri chungchangah chuan kan chet a ngai a ni," tiin, "Dan kalh a ni emaw ni lo emaw, i hmelma chu i in bei leh suam tura an rawn kal chuan i lo invenhim ve a ngai," a ti.

Tun hnaia Iongkhuli khuaa tualchhung mi leh Assam police-te intihbuaina thleng chungchangah, eng party leh eng sorkar mahin tun thlengin ramri buaina chu an la chingfel thei lo tih Shullai chuan a sawi. Meghalaya-a MDA sorkar hmalakna bakah, an mite venhimna tura lungrual taka an thawhho a ṭul thu a sawi.