Assam all party aiawhte Delhi-ah kal tum

Assam-a all party aiawh mi 19-te chu Mizoram nena ramri buaina an neih mek chungchangah sorkar laipui aiawhte hmuh a, a rang thei anga buaina chinfel sak tura nawr turin Delhi-ah an kal dawn.

All party team hi Assembly speaker Biswajit Daimary-a'n a ho dawn a ni. July 26 khan tun hnaia buaina chhuahna bulte tlawhin, Silchar-ah meeting an nei zui bawk.

Thuchhuah siamin, "Meeting-ah hian all party aiawhte hian central sorkar thuneitute hmuin, ramri buaina a rang thei anga chinfel tura nawr tura kal an rel a ni," an ti. Assam sorkarin ramri venna kawnga a hmalakna chu lungrual taka thlawp an rel bawk.

Speaker Daimary chuan Assam mipuite chu an ram humhimna tura inlungrual turin a chah a, "Mizoram-a party zawng zawngte an state ramri venhimna tura an inlungrual angin, Assam-a party zawng zawng pawh kan inlungrual ve a ngai a ni," a ti. An ram chin midangin an luahsak lohna turin inter-state border security chungchangah policy emaw, dan thar emaw siam a ṭul thu a sawi bawk a ni.